Алзас үүлдрийн Брюс нэртэй нохой Английн Нортумберландын эрэг дээр эзэнтэйгээ тоглож байхдаа хийлдэг каякан дээр сууж байжээ. Гэвч гэнэт ширүүссэн салхи завийг эргээс холдуулан авч одсоноор Брюс далайн дунд ганцаараа үлдсэн байна.

Сандарсан эзэн нь нохойныхоо араас сэлж оролдсон ч завь улам холдсоор байсан тул эргийн хамгаалалтын албанд ханджээ. Ингээд аяллын завины баг болон аврагчид хамтран эрэн хайх ажиллагаа эхлүүлсэн байна.

Хоёр цаг орчим хайсны эцэст аврагчид тэнгэрийн хаяанд үл ялиг харагдах жижиг каякийг олж илрүүлжээ. Ойртон очих хүртэл нохой дотор нь байгаа эсэх тодорхойгүй байсан ч Брюс завин дээрээ тайван суусан хэвээр байв.

Аврах үеэр нохой ус руу унасан ч багийн гишүүн Аарон Форди түүнийг агшин зуур шүүрэн авч завин дээр гаргаж чаджээ.

“Тэр чигээрээ хөвсөөр байсан бол Норвегийн зүг явж ч мэдэхээр байлаа. Брюсийг эсэн мэнд байхыг хараад үнэхээр баярласан” хэмээн аврах ажиллагаанд оролцсон ахмад Жимми Рийд ярьсан байна.

Хүйтэн ус, хүчтэй салхитай тэмцсэн Брюсийг дулаацуулж, асарсны дараа эзэнтэй нь уулзуулсан бөгөөд тэдний уулзалт аврагчдын хувьд хамгийн сайхан мөч байжээ.

Далайд төөрсөн нохойн энэхүү азтай түүх олон нийтийн сүлжээнд хурдтай тарж, Брюсийг аварсан багийнхныг хүмүүс баатрууд хэмээн магтан сайшааж байна.