1/2

Энэ удаагийн Монголын павильонд уран бүтээлч Б.Номин, Г.Гэрэлхүү, Ё.Төгөлдөр, Д.Дорждэрэм нарын бүтээлийг дэлхийн үзэгчдэд толилуулж байна.

Тэд “Entanglements: Connectivities Across Borders” төслийн хүрээнд Монголын нүүдэлчин соёлын философи, түүхэн ой санамж, уламжлал ба орчин үе, хүн ба байгаль хоорондын харилцааг уран зураг, видео, баримал, нэхмэл болон инсталляцийн бүтээлээр илэрхийлжээ.

Монголын павильоны ерөнхий куратороор доктор Ц.Уранчимэг, хамтарсан куратороор Томас Эллер ажиллаж байна.

Дэлхийн урлагийн салбарын төлөөлөгчид Монголын павильоны нээлтэд оролцов

Монголын үндэсний павильоныг 2026 оны тавдугаар сарын 8-нд албан ёсоор нээсэн бөгөөд нээлтийн арга хэмжээнд 150 гаруй зочин оролцжээ.

Тэдний дунд дэлхийн нэр хүндтэй урлагийн байгууллагууд болох Prada Foundation, Guggenheim Museum-ийн удирдлага, олон улсын куратор, урлагийн салбарын мэргэжилтнүүд багтсан талаар Соёл, спорт, аялал жуулчлал, залуучуудын яам мэдээлсэн байна.

Монголын павильоны нээлтийг олон улсын урлаг судлаач, шүүмжлэгчид эерэгээр үнэлсэн гэж тус яам мэдээлжээ.

Монголын орчин үеийн урлагийг дэлхийд таниулах боломж

1895 онд үүсгэн байгуулагдсан Венецийн биенналь нь дэлхийн орчин үеийн урлагийн хамгийн нэр хүндтэй арга хэмжээнүүдийн нэг бөгөөд урлагийн салбарын “Олимп” хэмээн нэрлэгдэх нь бий.

Монгол Улс Венецийн биеннальд 2015 оноос тогтмол оролцож ирсэн бөгөөд энэ удаагийн үндэсний павильон 2026 оны арваннэгдүгээр сарын 22 хүртэл олон улсын үзэгчдэд нээлттэй байна.

Монголын уран бүтээлчид дэлхийн 100 гаруй үндэсний павильонтой зэрэгцэн бүтээлээ толилуулж байгаа нь Монголын орчин үеийн дүрслэх урлаг, нүүдэлчин соёлын өв, уран бүтээлчдийн шинэ сэтгэлгээг олон улсын үзэгчдэд хүргэх томоохон боломж болж байна.