Pixar студийн шинэ бүтээл болох Toy Story 5 хүүхэлдэйн кино хүүхдүүдээс илүүтэйгээр эцэг эхчүүдийн сэтгэлд хүчтэй нөлөөлөх бүтээл болж магадгүй талаар шүүмжлэгчид онцолж байна.

31 жилийн өмнө анхны анги нь дэлгэцнээ гарч байсан "Toy Story" цувралын тав дахь бүтээл нь орчин үеийн хүүхдүүдийн амьдралд дэлгэц, таблет, цахим төхөөрөмж хэрхэн давамгайлж буй асуудлыг хөнджээ. Киноны гол зөрчил нь тоглоомууд болон "Lilypad" нэртэй ухаалаг таблетын хооронд өрнөнө.

Өмнөх ангиудад Вүди, Базз Лайтер болон тэдний найзууд өөрсдөө эзнээсээ холдох, мартагдах вий гэсэн айдастай тулгардаг байсан бол энэ удаад тэд хүүхдүүдийнхээ төлөө санаа зовж эхэлжээ. Найман настай Бонни улам бүр таблетдаа татагдан, тоглоомоор тоглох нь багасаж байгааг харсан тоглоомууд түүнийг эргэн бодит ертөнц, төсөөллийн тоглоом руу авчрахыг оролдоно.

Шүүмжлэгчдийн үзэж буйгаар киноны хамгийн хүчтэй хэсэг нь тоглоомуудын хувь заяа бус, харин орчин үеийн хүүхэд нас хэрхэн өөрчлөгдөж байгааг харуулсан явдал юм. Хүүхдүүдийн дэлгэцийн хэрэглээ, цахим дээрэлхэлт, ганцаардал зэрэг асуудлыг хүүхэлдэйн киноны хэлээр өгүүлсэн нь олон эцэг эхэд танил мэдрэмж төрүүлэхээр байгааг онцолжээ.

Киноны найруулагч Andrew Stanton уг бүтээлийг "Өнөөдөр хүүхдүүд тоглоомоор тоглох нь улам багасаж байгаа бодит асуудлын тухай өгүүлсэн түүх" хэмээн тодорхойлсон байна.

Шинэ ангид Вүди, Базз Лайтер, Жесси зэрэг танил дүрүүд эргэн ирэхээс гадна Lilypad нэртэй шинэ дүр гарч ирнэ. Шүүмжлэгчид киноны техникийн чанар, дүрслэлийг өндрөөр үнэлсэн ч зарим нь өмнөх ангиудын сэтгэл хөдөлгөм мөчүүдийг давтаж чадаагүй гэж үзжээ. Харин нөгөө хэсэг нь "Toy Story 3"-аас хойших хамгийн хүчтэй анги болсон хэмээн дүгнэсэн байна.

Тиймээс "Toy Story 5" нь хүүхдүүдэд зориулсан адал явдалт киноноос гадна өнөөгийн эцэг эхчүүдэд "хүүхэд нас гэж юу вэ?" гэсэн асуултыг дахин нэг удаа сануулах бүтээл болж магадгүй байна.