Европын сэргээн босголт, хөгжлийн банк (EBRD)-ны шинэчилсэн “Regional Economic Prospects” тайланд Казахстан, Кыргызстан, Монгол, Тажикистан, Туркменистан, Узбекистаны эдийн засаг нийлбэр дүнгээр 2026 онд 5.6 хувь, 2027 онд 5.3 хувиар өсөх төлөвтэй гэж тооцжээ.

Монголын эдийн засаг 5.5 хувиар өснө

Монгол Улсын хувьд эдийн засгийн бодит өсөлт 2026 онд 5.5 хувь, 2027 онд мөн 5.5 хувь байх төлөвтэй байна.

EBRD-ийн мэдээлснээр Монголын эдийн засгийн өсөлтийг хөдөө аж ахуйн салбарын сэргэлт болон уул уурхайн идэвхжил голлон дэмжиж байна.

Тухайлбал, 2026 оны эхний улиралд Монголын аж үйлдвэрийн үйлдвэрлэл өмнөх оны мөн үеэс 61.2 хувиар өсжээ. Үүнд нүүрс, зэсийн олборлолт эрчимтэй сэргэсний нөлөө их байв.

Мөн иргэдийн хэрэглээ тогтвортой хэвээр байгаа бөгөөд 2026 оны гуравдугаар сарын байдлаар хэрэглээний зээлийн хэмжээ өмнөх оны мөн үеэс 16.5 хувиар өссөн байна.

Төв Ази, Монгол өсөлтөөр тэргүүлэх төлөвтэй

EBRD-ийн дүгнэлтээр Төв Ази болон Монголын эдийн засаг 2026 оны эхээр геополитикийн хүндрэлүүдийг харьцангуй тэсвэртэй даван туулж байна.

Дотоодын хэрэглээ болон хөрөнгө оруулалт эдийн засгийн өсөлтийг үргэлжлүүлэн дэмжиж байгаа бөгөөд үйлчилгээний салбар, барилга, үйлдвэрлэл өсөлтийн чухал хөдөлгөгч болжээ.

Бүс нутгийн эдийн засаг 2026 онд 5.6 хувиар өсөх төлөвтэй байгаа нь EBRD-ийн үйл ажиллагаа явуулдаг бүс нутгуудаас хамгийн өндөр үзүүлэлтэд тооцогдож байна.

Эрсдэл бас бий

Өөдрөг төлөвтэй хэдий ч Монголын эдийн засагт нөлөөлөх гадаад эрсдэл байгааг EBRD анхааруулжээ.

Ялангуяа Монголын худалдааны гол түнш БНХАУ-ын эдийн засгийн өсөлт саарах, олон улсын эрчим хүч, шатахууны үнэ нэмэгдэх зэрэг хүчин зүйл Монголын өсөлтийг сааруулах эрсдэлтэй.

Гэсэн хэдий ч хөдөө аж ахуйн сэргэлт, уул уурхайн үйлдвэрлэлийн өсөлт үргэлжилж байгаа нь Монголын эдийн засгийг 2026–2027 онд тогтвортой өсөлтөө хадгалах боломжтой гэж EBRD үзэж байна.

Эх сурвалж: Европын сэргээн босголт, хөгжлийн банк (EBRD), Regional Economic Prospects, 2026