Андуурч хоёр тасалбар авсан эр 900 мянган ам.долларын эзэн болжээ
Зарим алдаа хүний амьдралыг бүхэлд нь өөрчилдөг. Их Британийн тэтгэвэрт гарсан иргэн Аллан Тэйлор сугалааны тасалбар авахдаа санамсаргүйгээр нэгийн оронд хоёр тасалбар худалдан авсан нь түүнд бараг 900 мянган ам.долларын ашиг авчирчээ.
Түүний оршин суудаг бүсийн шуудангийн код сугалааны азтан болж тодорсон бөгөөд нэг тасалбар тутамд 333 мянган фунт стерлингийн шагнал ногдсон байна. Харин Аллан андуурч хоёр тасалбар худалдаж авсан тул нийт 666 мянга гаруй фунт стерлинг буюу ойролцоогоор 893 мянган ам.долларын эзэн болжээ.
65 настай азтан энэ явдлыг “амьдралдаа хийсэн хамгийн ашигтай алдаа” хэмээн тодорхойлсон байна. Тэрбээр эхнэрийнхээ олон жилийн мөрөөдөл болсон Австрали руу аялах төлөвлөгөөгөө биелүүлэхээр болжээ. Мөн гэр бүлийнхээ ирээдүйн төлөвлөгөөнд хөрөнгө оруулахаар болсон байна.
“Юу болсныг сонсоод үг хэлэх ч сөхөөгүй. Нэг тасалбарын оронд хоёр авсандаа өмнө нь харамсаж байсан ч одоо бол энэ миний хийж байсан хамгийн зөв алдаа болсон” хэмээн тэр ярьжээ.
Ийнхүү энгийн нэгэн андуурал тэтгэврийн амьдралаа эхлүүлж буй хосын хувьд санаанд оромгүй аз болж хувирсан байна.