Сүүлийн үеийн судалгаагаар Италийн нэрт урлаач Antonio Stradivari хийлээ бүтээхдээ ашигласан мод нь тусгай химийн боловсруулалтанд орсон байж болзошгүйг тогтоосон байна. Судлаачид түүхэн хийлүүдийн модноос авсан дээжид эрдэс давс болон хамгаалалтын бодисын ул мөр илрүүлжээ.

Эдгээр бодис нь модны бүтэц, нягтралд нөлөөлж, чичиргээ дамжуулах чадварыг нь өөрчилснөөр Страдиварийн хийлийн өвөрмөц, тунгалаг дуугаралтыг бий болгосон байж магадгүй гэж үзэж байна.

Гэсэн хэдий ч эрдэмтэд энэ нь ганц шалтгаан биш болохыг онцолжээ. Урлаачийн гарын ур дүй, хийцийн нарийн шийдэл, лакны найрлага болон тухайн үеийн байгаль, цаг уурын нөхцөл зэрэг олон хүчин зүйл хамтдаа энэхүү домгийг бүтээсэн байх магадлалтай ажээ.

Өнөөдөр дэлхий дээр Страдиварийн бүтээсэн 650 орчим хөгжим хадгалагдан үлдсэн бөгөөд тэдгээрийн зарим нь олон сая ам.долларын үнэлгээтэй байдаг. Гэвч тэдний гайхамшигт дуу авиа хэрхэн бий болсон талаарх асуулт хэдэн зууны турш бүрэн тайлагдаагүй хэвээр байсан юм.

Шинэ судалгааны үр дүн нь энэхүү алдарт хөгжмийн зэмсгийн нууцыг тайлахад нэг алхам ойртсон ч Страдиварийн ур чадварын гайхамшгийг бүрэн тайлбарлаж чадах эсэх нь одоогоор тодорхойгүй хэвээр байна.